កូរ៉េខាងត្បូង៖ សមាជិកសភាកូរ៉េខាងត្បូង ដែលដកស្រង់សំដីពីភ្នាក់ងារចារកម្មរបស់ខ្លួនបាននិយាយថា កូរ៉េខាងជើងអាចនឹងធ្វើសមយុទ្ធទ្រង់ទ្រាយធំ ដោយរួមជាមួយនឹងការបាញ់សាកល្បងមីស៊ីលផ្លោងអន្តរទ្វីប (ICBM) ថ្មីរបស់ខ្លួនក្នុងខែមីនា ឬក្នុងខែមេសាខាងមុខនេះ។

ក្រៅពីពាក់ព័ន្ធនឹងការត្រៀមធ្វើសមយុទ្ធយោធារបស់កូរ៉េខាងជើង កូរ៉េខាងត្បូងក៏បានបញ្ជាក់ពីព័ត៌មានមួយចំនួនទៀតដោយផ្អែកតាមការរាយការណ៍ដោយក្រុមការងារនៃភ្នាក់ងារជាតិចារកម្មរបស់ខ្លួនឱ្យដឹងថា កូនដំបូងរបស់មេដឹកនាំកូរ៉េខាងជើងគឺជាកូនប្រុស ខណៈដែលកូនទី៣ គេនៅមិនទាន់ច្បាស់នៅឡើយទេថាជាកូនប្រុស ឬកូនស្រី។ បន្ថែមពីលើនេះ ប្រភពរាយការណ៍ខាងលើបញ្ជាក់ថា កូនប្រុសដំបូងរបស់មេដឹកនាំកូរ៉េខាងជើងរូបនេះ នៅមិនទាន់បានបង្ហាញខ្លួនជាសាធារណៈម្តងនៅឡើយទេ។ 

គួរបញ្ជាក់ថា កន្លងមកកូនស្រីរបស់់លោក Kim Jung Un ដែលគេស្គាល់ថាឈ្មោះ Kim Ju Ae ត្រូវបានគេប្រទះឃើញបង្ហាញខ្លួនជាសាធារណៈជាមួយឪពុក នៅក្នុងកម្មវិធីមួយចំនួននៅប៉ុន្មានខែថ្មីៗនេះដែលជំរុញឱ្យមានការរំពឹងទុកថានាងត្រូវបានគេរៀបចំឱ្យធ្វើជាមេដឹកនាំកំពូលបន្ទាប់ពីឪពុករបស់នាង។

ដោយឡែក ពាក់ព័ន្ធនឹងកត្តាកង្វះស្បៀងអាហាររបស់កូរ៉េខាងជើង ភ្នាក់ងារជាតិចារកម្មកូរ៉េខាងត្បូងបានសន្មតថាវាអាចនឹងបណ្ដាលមកពីគោលនយោបាយគ្រាប់ធញ្ញជាតិ បញ្ហានៃការចែកចាយ និងស្ថានភាព COVID-១៩ ក្នុងប្រទេសនាពេលកន្លងមក ប៉ុន្តែទីភ្នាក់ងារនេះបានបន្ថែមថាវាមិនធ្ងន់ធ្ងរគ្រប់គ្រាន់ដល់ថ្នាក់ចាត់ទុកថាជាការគំរាមកំហែងដល់របបនេះទេ ផ្ទុយពីព័ត៌មាននៃការផ្សព្វផ្សាយកន្លងមកថាកូរ៉េខាងជើងកំពុងខ្វះខាតនូវការផ្គត់ផ្គង់ស្រូវប្រចាំឆ្នាំប្រមាណជា ៨០០,០០០តោន៕